P.S.VEERAPPA BIOGRAPHY

 

 

 P.S.VEERAPPA BIOGRAPHY

அலட்சியமான சிரிப்பு. 

அட்டகாசமான உடல்மொழி. 

வெண்கலக் குரல். 

கன கம்பீரமான உச்சரிப்பு. 

தமிழ் சினிமாவின் வில்லன்கள் வரலாறு பி.எஸ்.வீரப்பாவிடமிருந்தே தொடங்குகிறது.

இந்தி சினிமாவின் புகழ்பெற்ற வில்லன் ப்ரான் அவர்களை உங்களில் பலருக்கும் தெரிந்திருக்கலாம். இந்திய சினிமாவின் வில்லன் நடிகர்களில் மிகவும் முக்கியமானவர் இவர். வில்லன் நடிகர் என்ற பெயர் புகழ்பெறத் தொடங்கிய ஆரம்ப காலகட்டங்களில் அந்தப் பெயர் நிலைக்க ஆரம்பிக்க, பாடுபட்ட முக்கியமான நடிகர் இவர். இப்பொழுதும் இந்தியின் க்ளாஸிக் படங்கள் பற்றிப் பேசினால், அதில் இவரது பெயரும் இருக்கும். இப்போது எதற்கு இந்த வரலாற்றை நான் சொல்கிறேன் என்றால், தமிழில் வந்த வஞ்சிக்கோட்டை வாலிபன் படத்தை எஸ்.எஸ்.வாசன் இந்தியிலும் எடுத்தார். அதில் வில்லனாக ப்ரான் நடித்தார். தமிழில் வைஜெயந்தி மாலாவும், பத்மினியும் ஆடும் புகழ்பெற்ற நடனக்காட்சி ஒன்று வரும். அந்த காட்சியில்,"சபாஷ் சரியான போட்டி.."என்றொரு வசனம் வரும்.

இதே வசனம் இந்தியில் ப்ரான் பேசுவதாக வரும். அந்த வசனம் மிகப்பெரிய தாக்கத்தை இந்தியில் ஏற்படுத்தவில்லை. ஆனால், இதே வசனம் தமிழ் சமூகத்தில் இன்றளவும் புழக்கத்தில் இருக்கும் ஒரு பழமொழியை போல மாறி நிற்கிறது. இந்த வசனத்தைக் குறிப்பிட்டு, ப்ரானிடம் அவர்களிடம் "தமிழைப் போல இந்தியில் இந்த வசனம் ஏன் அவ்வளவு புகழ்பெறவில்லை?" என்ற கேள்வியைக் கேட்டபொழுது, அதற்கு அவர் சிரித்துக்கொண்டே,"என்ன செய்ய.. தமிழில் இந்த வசனத்தை உச்சரித்த பி.எஸ்.வீரப்பாவிற்கு இருப்பதை  போன்ற குரல் எனக்கு அமையவில்லையே!" என்று சொன்னாராம்.

மேற்கண்ட ஒரே ஒரு தகவல் போதும் பி.எஸ்.வீரப்பா என்கிற வில்லன் நடிகரின் பெருமையை நாம் உணர. வீரப்பன் என்கிற இயற்பெயர் கொண்ட பி.எஸ்.வீரப்பா ஸ்ரீமுருகன், ராஜமுக்தி,மதனமாலா போன்ற படங்களில் சிறு சிறு வேடங்களில் நடித்துக்கொண்டிருந்தார். எம்ஜிஆர் நாயகனாக நடித்த மருதநாட்டு இளவரசி படத்திலுமே கூட நடித்திருப்பார். இதே நேரத்தில் எம்.என்.நம்பியாரும் ஒரு வில்லனாக இன்னொருபுறம் நடித்துக் கொண்டிருந்தாலும் கூட, பி.எஸ்.வீரப்பாவிற்கென்று ஒரு தனி ரசிகர் கூட்டம் ஏற்பட்டிருந்தது. அதற்கான மிக முக்கிய காரணம் வீரப்பாவின் வசன உச்சரிப்பும், அவரின் வில்லத்தனம் நிறைந்த சிரிப்பும்.

உண்மையில் ஒரு வில்லனுக்கான தனி அடையாளமாக ஒரு விஷயத்தை முதன்முதலில் தமிழ் சினிமாவில் நிலைநிறுத்தியது வீரப்பாதான். அடுக்குமொழி வசனங்களை உச்சரிக்கும்போது மிகச்சரியான இடைவெளியில் வார்த்தைகளை உச்சரிக்க வேண்டியது மிகமுக்கியம். அதேபோல் வசனம் பேசி முடிக்கையில் அதில் ஒரு பன்ச் இருக்கவேண்டும். ஒருவிதமான லாவகமான ஒயில் அதில் இருப்பது அவசியம். இந்த விஷயங்கள்தான் மனப்பாடம் செய்து ஒரு வசனத்தை ஒப்பிப்பதற்கும், கேமரா முன்பு நடிப்பதற்குமான மிகப்பெரிய வித்தியாசம். அதை வீரப்பா மிக அழகாகச் செய்தார். உதாரணமாக மஹாதேவி படத்தில் வரும் ஒரு வசனத்தைப் பார்க்கலாம். கருணாகரனாக வீரப்பா நடித்த படம் அது.

"தளபதியாரே..காயைக் கனிய வைக்கும் உங்கள் கனிவான முயற்சிக்கு இந்த கருணாகரனின் அன்புப்பரிசு.."

"விளையாடாதே கருணாகரா.. நான் வேதனையில் இருக்கிறேன்.."

(ஒரு நக்கல் சிரிப்போடு) "வேதநாயகர் வேதனை நாயகர் ஆவதேன்? சோதனை செய்கிறாளா மாது? சொன்ன பதில் நல்ல பதிலாக இல்லையோ?"

"என்ன பிதற்றுகிறாய்?"

"பித்துப் பிடித்தவர்களுக்கு மற்றவர்களின் பேச்சு பிதற்றலாகத்தான் தெரியும்"

"வார்த்தை நீளுகிறது கருணாகரா!!"

"என் வாளும் நீண்டிருக்கும் நீ வரம்பு மீறி போயிருந்தால்..ஆளில்லாத நேரம் பார்த்து நாள் குறிக்க வந்தாயா? எனக்கென்று பிறந்தவள் மகாதேவி. அவளை நீ தேடிவந்ததே முதல் தவறு"

"ஊரார் தோட்டத்து கனி அது. யாரை விரும்புகிறது என்று தெரியாமலேயே வேலி போடுகிறாய்.விளையாட பார்க்கிறாய்.சொந்தம் கொண்டாட உனக்கென்ன உரிமை?"

"அதற்கு என் வாள்தான் பதில் சொல்லும்.."

"....."

"வேதநாயகத்துக்கு அந்த மாதுதான் நாயகி..இல்லையேல்..."

"எனக்கும் அப்படித்தான்..மணந்தால் மஹாதேவி...இல்லையேல் மரணதேவி!!!" - என்று கூறிவிட்டு இறுக்கமான சிரிப்போடு அந்த இடத்தை விட்டு அகலுவார் பி.எஸ்.வீரப்பா. இந்த மஹாதேவி-மரணதேவி வசனம் தமிழகமெங்கும் பட்டிதொட்டியெல்லாம் பெரும் வரவேற்பைப் பெற்றது. அதேபோல் ராஜராஜன் படத்தில் இளவரசனைக் கொல்வதற்காகத் திட்டம் போடும் பி.எஸ்.வீரப்பாவின் கட்டளையைச் செவிமடுக்காத எம்.என்.நம்பியாருடன் வீரப்பா பேசும் வசனங்களும் மக்களை மிகவும் கவர்ந்தன.

 

கைதி கண்ணாயிரம் படத்தில் சிறைக் கைதியாக இருக்கும் பி.எஸ்.வீரப்பா, தனக்கு மசாஜ் செய்துவிட தங்கவேலுவை அழைப்பார். அவரின் மேற்சட்டை இல்லாத உடற்கட்டைப் பார்த்து தங்கவேலு,"ஆகா என்ன உடம்பு.. கான்கிரீட் கட்டடம் மாதிரி இருக்கு.." என்று சொல்வார். அந்தளவு தனது உடலை முறுக்கேற்றி வைத்திருந்தார் பி.எஸ்.வீரப்பா. 

அலிபாபாவும் நாற்பது திருடர்களும் படம் தமிழின் முதல் முழுநீள வண்ணப்படம் என்கிற பெருமையை கொண்டது. எம்ஜிஆர் நாயகனாக நடித்த இந்தப்படத்தில், நாற்பது பேர் கொண்ட திருடர் குழுவின் தலைவனாக பி.எஸ்.வீரப்பா தோன்றுவார். "அண்டாகா கசம் அபுகா குசும் திறந்திடு சீஸேம்" என்கிற வசனம் ஒரு ரசிகர்கள் நெஞ்சில் ஒரு மந்திரம் போல நிலைத்து நின்றது. படத்தில் இந்த வசனத்தை முதலில் பேசுவதே வீரப்பாதான். ஒரு நாடோடிக் கதையை அடிப்படையாக கொண்ட இந்த படம் எம்ஜிஆரின் திரை வாழ்வில் ஆரம்பகட்டத்தில் மிகப்பெரிய வெற்றியைப் பெற்ற படங்களில் ஒன்று. படத்தின் மிகப்பெரிய சிறப்பம்சங்களில் ஒன்று வாள் சண்டை. 

சண்டைக்காட்சிகளில் ஆரம்ப காலத்தில் இருந்தே எம்ஜிஆர் மிகுந்த ஈடுபாடு கொண்ட ஒரு நடிகராக இருந்தார். வாள்சண்டை அவரது சிறப்பம்சம். என்னதான் எம்ஜிஆர் சிறந்த வாள்வீச்சு திறமை கொண்டிருந்தாலும் கூட, வில்லனும் அதற்கு நிகரான வாள்வீச்சு திறமை கொண்டிருந்தால் மட்டுமே திரையில் அது எடுபடும். அந்தவகையில் அரசர் காலத்து கதையம்சம் கொண்ட எம்ஜிஆர் படங்களில் பி.எஸ்.வீரப்பா எம்ஜிஆருக்கு இணையான புகழை இந்த வாள்சண்டை காட்சிகள் மூலம் பெற்றார். அந்நேரத்தில் எம்ஜிஆர் நடித்த எல்லா முக்கியமான படங்களிலும் வீரப்பா நடித்தார் என்பது இங்கே குறிப்பிடத்தக்கது. சக்ரவர்த்தி திருமகள், நாடோடி மன்னன், மன்னாதி மன்னன், விக்ரமாதித்தன், அரசகட்டளை என்று அந்த பட்டியல் மிகப்பெரியது.

இதுமட்டுமின்றி, சிவாஜி கணேசனின் தங்கமலை திருடன், மருதநாட்டு வீரன்  படத்திலும் பி.எஸ்.வீரப்பாவே வில்லனாக நடித்தார். அதேபோல் வாள்வீச்சில் மிகவும் புகழ்பெற்ற ரஞ்சன் நடித்த நீலமலை திருடன் படத்திலும் வீரப்பா நடித்திருந்தார். ஜெமினி கணேசனின் பூலோக ரம்பை, பார்த்திபன் கனவு ஆகிய படங்களிலும் முக்கிய வேடங்களில் தோன்றி கலக்கினார்.

மேற்கண்ட எல்லா படங்களுமே சரித்திரக் கதைகளாக இருந்ததை நீங்கள் கவனித்திருக்கலாம். பி.எஸ்.வீரப்பா சமூகப்படங்களிலும் கூட சாதித்திருக்கிறார். சிவாஜியின் ஆலயமணி படத்தைத் தயாரித்ததே பி.எஸ்.வீரப்பாதான்.அதில் ஒரு சிறுவேடத்திலும் நடித்திருப்பார். பின்னர் எம்ஜிஆரை வைத்து அவர் தயாரித்த ஆனந்த ஜோதி படம் எதிர்பார்த்த வெற்றியைப் பெறாமல் போக, பின்னர் ஆலயமணி படத்தை இந்தியில் ரீமேக் செய்தார். அதுவும் தோல்வியில் முடிய, திரை உலகிலிருந்தே விலகி, அமைதியான வாழ்க்கையில் ஈடுபட்டார்.

தமிழ் சினிமாவின் வில்லன்கள் வரலாறு பி.எஸ்.வீரப்பாவிடமிருந்தே தொடங்குகிறது. அவரது காலகட்டத்திலேயே எம்.ஆர்.ராதா, எம்.என்.நம்பியார் போன்றோர் வளர்ச்சி பெற்றாலும் கூட, பி.எஸ்.வீரப்பாவின் தனித்துவம் தமிழில் இன்றும் அவர் நிலைபெற்றிருப்பதற்கான காரணங்களில் ஒன்றாக விளங்குகிறது. என்னதான் பத்துக்கும் மேற்பட்ட நடிகர்கள் ஜேம்ஸ்பாண்ட் கதாபாத்திரத்தில் நடித்திருந்தாலும் கூட, முதன்முதலில் அந்த பாத்திரத்தை ஏற்ற சேன் கானரிதான் ஜேம்ஸ் பாண்ட் கதாபாத்திரத்துக்கு உருவம் கொடுத்தவர். அதைப்போலத்தான் வீரப்பாவும். வில்லன் நடிகரின் திரை ஆளுமை எவ்விதம் இருக்கவேண்டும் என்பதற்கான பாலபாடம் பயிற்றுவித்தவர் அவர். 

எப்போதுமே ஓர் ஆளுமை முன்னேறிக் கொண்டிருக்கையில் அதேபாதையில் பயணிக்க விருப்பப்படும் நிறையப் பேரை நாம் காணலாம். அதில் ஒரு சிலர் மட்டும் அந்தப் பாதையை விடுத்து, தனக்கென ஒரு தனிவழியை அமைப்பதில் ஈடுபடுவா. அவர்களே வரலாற்றில் நிலைத்திருக்கவும் செய்வார்கள்.

 

 

P. S. Veerappa

பி. எஸ். வீரப்பா (பிறப்பு 09.10.1911- இறப்பு-09.11.1998) வயது-80. புகழ்பெற்ற தமிழ்த் திரைப்பட நடிகர்  ஆவார். பெரும்பாலான படங்களில் வில்லனாக நடித்த இவர் திரைப்படத் தயாரிப்பாளராகவும் இருந்துள்ளார்.

ஆரம்ப கால வாழ்க்கை

1911-ம் ஆண்டு காங்கேயத்தில் பிறந்த வீரப்பா பொள்ளாச்சியில் உள்ள தனது தாத்தாவின் வீட்டில் வளர்ந்தார். படிப்பின் மீது ஆர்வம் கொண்டிருந்த போதிலும், அதிகப்படியான குடும்ப உறுப்பினர்களும், குறைந்த குடும்ப வருமானம் இருந்த காரணத்தினாலும் பல சிறு வியாபாரம், தொழில்களில் ஈடுபட்டார். சென்னைக்கு வரும் முன்னர் கோயில் திருவிழாக்களில் நடைபெறும் நாடகங்களில் நடித்து வந்தார். சிவன்மலையில் அப்படி நடைபெற்ற ஒரு நாடகத்தில் இவரைப் பார்த்த கே. பி. சுந்தராம்பாளும் அவரது சகோதரரும், சென்னைக்கு வருமாறும், திரைப்படங்களில் நடிக்குமாறும் வலியுறுத்தினர். சென்னைக்கு வந்த பிறகு கே. பி. சுந்தராம்பாள் தன்னுடைய ஒரு சிபாரிசுக் கடிதத்துடன் இவரை இயக்குனர் எல்லீஸ் ஆர். டங்கனிடம் அனுப்பினார்.

திரைப்பட வாழ்க்கை

பி. எஸ். வீரப்பாவின் உரத்த சத்தத்துடன் கூடிய பயங்கரச் சிரப்பு அந்தக்காலத்து திரைப்பட ரசிகர்களிடையே மிகப் பிரபலம். கே. பி. சுந்தராம்பாள் முக்கிய வேடத்தில் நடித்த, டங்கனின் மணிமேகலை என்கிற திரைப்படத்தில் வீரப்பா அறிமுகமானார். தனது முத்திரைச் சிரிப்பான உரத்த ஹ ஹா ஹா.. என்பதை சக்கரவர்த்தி திருமகள் திரைப்படத்தில் செய்தார். இந்தச் சிரிப்பிற்கு கிடைத்த வரவேற்பின் காரணமாக அதன் பிறகு, இதை தனது பாணியாக எல்லா படங்களிலும் பயன் படுத்த ஆரம்பித்தார். எம்.ஜி.ஆர், சிவாஜிகணேசன் போன்றோரிலிருந்து

கமல்ஹாசன், ரஜினிகாந்த், விஜயகாந்த் போன்றோர் படங்கள் வரை நடித்துள்ளார்.

பி. எஸ். வீரப்பாவின் புகழ்பெற்ற நடிப்பு பாணிகள், முத்திரை வசனங்கள்

• எதிர் நாயகன்களுக்கு உரிய உரத்த ஹ ஹா ஹா.. சிரிப்பு (சக்கரவர்த்தி திருமகள் திரைப்படத்திலிருந்து, கிட்டத் தட்ட எல்லா படங்களிலும்)
• சபாஷ், சரியான போட்டி.. (வஞ்சிக்கோட்டை வாலிபன் திரைப்படத்தில்)
• மணந்தால் மகாதேவி, இல்லையேல் மரணதேவி (மகாதேவி திரைப்படத்தில்)

 

வில்லன் வீரப்பாவிற்கு வெல்லமாக பாட்டு!

தயாரிப்பாளர்களைப் பழைய, வசதியுள்ள நபர்களா, புதிதாகப் படம் எடுக்க வருபவர்களா என்றெல்லாம் இனம் பிரித்துப் பார்க்காமல், தன்னுடைய இசை தேவைப்படுகிற பலருக்கும் இடைவிடாமல் பணியாற்றுவதை மகாதேவன் ஒரு மூலமந்திரமாகக் கொண்டு செயல்பட்டுக் கொண்டிருந்தார். அது அவருக்கு மட்டுமல்ல, அவரை நம்பி எண்ணிக்கையில் பெருகிக் கொண்டிருந்த அவருடைய இசைக்குழுவினருக்கும் அத்தியாவசியமாக இருந்தது. ‘ராத்திரிக்கு பூவாவுக்கே லாட்டரி’ என்று கஷ்டப்பட்டுக்கொண்டிருந்த எத்தனையோ வாத்தியக் கலைஞர்களுக்கு மகாதேவனின் குடைநிழல் அடைக்கலம் தந்த வண்ணம் இருந்தது.

ஐம்பதுகளில் பிரபல வில்லனாக இருந்த பி.எஸ். வீரப்பா, பின்னாளில் தயாரிப்பாளராவும் பிரகாசித்தார். எம்.ஜி.ஆர்., நடித்த ‘ஆனந்த ஜோதி’, சிவாஜி நடித்த ‘ஆலயமணி’, ‘ஆலயமணி’யின் இந்தி தயாரிப்பான ‘ஆத்மி’ என்று பல படங்களைத் தயாரித்தார். அவருடைய தயாரிப்பு நிறுவனமான பி.எஸ்.வி. பிக்சர்ஸ்  நீண்ட ஆயுள்கொண்ட ஸ்தாபனமாக விளங்கியது. வீரப்பாவின் முதல் படமான ‘பிள்ளைக்கனியமுது’ மகாதேவனின் இசையமைப்பில் வந்தது. மகாதேவன் ராசிக்காரர் என்பதற்கு இன்னொரு சான்றாக அமைந்தது வீரப்பாவின் தயாரிப்பு நிறுவனம்!

‘இந்தக் காலத்தில நாடகமானாலும் சினிமாவானாலும் டைட்டில் வால்யூ முக்கியம்’ என்ற வசனத்துடன்  வந்தது, ‘பிள்ளைக்கனியமுது’.  அருமையான தலைப்பைப் பெற்றிருந்தாலும், படம் ஒரு வினோதமான கலவை. மசாலாத்தனத்தின் சிகரம்!

எஸ்.எஸ். ராஜேந்திரன் வயலில் ஏர் உழுகிறார், சிறுத்தையுடன் சண்டையிடுகிறார், ஒரு பெண்ணைக் காதலித்துவிட்டு (ஈ.வி. சரோஜா) இன்னொரு பெண்ணை விரும்பி மணக்கிறார் (எம்.என். ராஜம்), கண்ணை இழந்து   ‘ரத்தக்கண்ணீர்’ ராதாவைப் போல் கதறுகிறார், ஒரு விபத்தில் பறிபோகும் பார்வை இன்னொரு விபத்தில் திரும்புவதன் காரணமாக, வில்லன் பி. எஸ். வீரப்பாவின் காரைத் தன்னுடைய ரேக்ளா வண்டியில் துரத்தி மோதலில் ஈடுபடுகிறார்!

இவையெல்லாம் போதாதென்று, எஸ்.எஸ். ஆருக்காக, அப்பட்டமான அரசியல் வாடை வீசும் வசனங்களும்  சேர்க்கப்பட்டிருந்தன. தனக்கு எப்படிப்பட்ட குழந்தை பிறக்க வேண்டும் என்று யோசிக்கும் போது, அறிஞரின் அறிவு, நாவன்மை, கவிஞரின் கற்பனை, கலைஞரின் திறமை ஆகியவை இருக்க வேண்டும் என்பது அவருடைய ஆசை என்கிறார்! ‘‘கடமை– கண்ணியம்– கட்டுப்பாடு ஆகியவற்றை மறப்பவர்கள் யாராக இருந்தாலும், என் நிலைமையைக் கண்டாவது திருந்தட்டும்’’, என்று வில்லன் வீரப்பாவும் கடைசியில் ஒரு போடு போடுகிறார்!

இப்படியெல்லாம் இருந்தாலும், வெற்றிப்பாடல்கள் தந்துகொண்டே இருக்கவேண்டும் என்று மகாதேவன் கங்கணம்கட்டிக்கொண்டு செயல்பட்டார். ‘பிள்ளைக்கனியமுது’விற்கும் ஜீவகளை சிந்தும் பாடல்களை வழங்கினார். ‘மக்களைப் பெற்ற மகராசி’யில் ஒலித்த ‘பொன்னு விளையிற பூமியடா’விற்கு ஒன்றும் சளைத்ததில்லை, ‘பிள்ளைக்கனி யமுது’வில் ஒலிக்கும் ‘ஏர்முனைக்கு நேர் இங்கே எதுவுமே இல்லே’ என்ற பாடல். தன்னுடைய திறமை மீது நம்பிக்கை வைத்த மகாதேவன் தந்த உற்சாகத்தால், மனம் திறந்து உணர்ச்சிப் பொங்க பாடலைப் பாடினார் சவுந்தரராஜன்! கவித்துவம் பொங்கும் மருதகாசியின் இந்த வேளாண்மைப் பாட்டிற்குள், கதிர்மணிகளுடன் கதிரவனையும் காற்றையும் நிரப்பிவைத்திருக்கிறார்கள் மகாதேவனும் டி.எம்.எஸ்ஸும்!

‘பிள்ளைக்கனியமுது ஒன்று பிறந்திட வேண்டும்’ என்று வசியம் செய்யும் வர்ண மெட்டுடைய பாடல்,  படத்தில் மூன்று முறை ஒலிக்கிறது என்பதிலிருந்தே அதற்கு கொடுக்கப்பட்ட முக்கியத்துவம் தெரிகிறது.  ஐம்பதுகளின் பிற்பகுதியில் மகாதேவன் பக்குவப்படுத்தி வைத்திருந்த ஒரு இந்துஸ்தானி கலந்த மெல்லிசை ஜாலத்திற்கு சான்றாக உள்ளது, பி.சுசீலாவும் சீர்காழி கோவிந்தராஜனும் பாடும் இந்தப் பாடல்.

‘ஓடுகிற தண்ணியிலே  ஒறசி விட்டேன் சந்தனத்தை’  என்ற நாட்டுப்பாடல், அதற்குப் பொருத்தமான மெட்டமைப்பில் இரு குரலிசையாக மிளிர்கிறது (பி.சுசீலா, சீர்காழி கோவிந்தராஜன்).  ஆறு, காதலியையும் காதலனையும் பிரிக்கிறது...அவள் சந்தனத்தை உரசிவிட்டு பாலம் அமைக்கப்பார்க்கிறாள்... அதற்குப் பொருத்தமாக  சந்தனப்பொட்டு வச்சு வந்திருக்கிறேன் என்கிறான் மச்சான். அழகான பாடல்.

இந்தப் பாடலின் எதிரொலி, பழமையை மதித்த வி.எஸ். நரசிம்மனின் இசையில் ‘அச்சமில்லை அச்சமில்லை’யில் வந்தது (1984). மகாதேவனின் வாத்தியக் கோஷ்டியில் வயலின் கலைஞரராகப் பணியாற்றியிருந்த வி.எஸ்.நரசிம்மன், மாமா மீது மிகுந்த மரியாதை வைத்திருந்ததாக என்னிடம் தெரிவித்தார். அவருடைய மெல்லிசை ஜாலத்திற்கு மரியாதை செலுத்தும் வகையில்தான், தானும் அதற்கு இசையமைத்தார். படத்தில் பட்டுக்கோட்டை கல்யாணசுந்தரம் ஒரே ஒரு பாடல் எழுதினார். அது காக்காய் கல்யாணத்தை சித்தரித்த, கிராமிய மணம் கமழும் பாடல். பாடலின் இரண்டாவது கட்டத்தில், பொய்க்கால் குதிரை ஆட்டமும் இணைகிறது. கவிஞரின் வரிகளில் கடந்து போன  காலத்தில் இசை நாடகங்கள் மீது மக்களுக்கு இருந்த நாட்டம் வெளிப்படுகிறது.

‘‘ஆடுதுறை தங்கமணி அல்லி வேஷம் போடுறாளாம், நாடகம் பாக்கப் போறேன், வாறீயா பெண்ணே’’ என்று காதலன் அழைக்கிறான். நாடகம் இரவெல்லாம் நடக்கும் என்பதாலோ, ‘நாளைக்குத் திரும்பிடலாம் ஜாலியா’ என்கிறான்.

பட்டுக்கோட்டையாருக்கு இடையே கொஞ்சம் கிண்டலை சொறுகிவிட ஆசை போலும். நாடக நடிகைக்கு ‘பத்துக்குரல்’ என்ற அடைமொழி கொடுக்கிறார். இரவெல்லாம் நாடக மேடையில் கத்தினால் பத்துக்குரல் என்ன, பதினோரு குரல் கூட வருமே!

‘‘பத்துக்குரல் முத்துக்கண்ணு பாடுறாளாம் பவளக்கொடி   வேஷத்திலே ஆடுறாளாம் சீனுகளாம் ஜிமிக்கிகளாம், நீ சிரிக்கிற மாதிரி வெளிச்சங்களாம், பெண்ணே!’’

பாடலிலே கிண்டல் பொதிந்திருக்கிறது என்பதற்கு இன்னொரு அத்தாட்சி. பாடலுக்கு அபிநயம் பிடிக்கும் போது, ‘முத்துக்கண்ணு’ என்று வரும்போது எஸ்.எஸ்.ஆர். மாறுகண்ணைக் காட்டுகிறார்.

தன்னுடைய வில்லன் வேடத்திற்குக் கூடுதல் ‘வெயிட்’ கொடுத்து, தனது தயாரிப்பாக ‘பிள்ளைக்கனியமுது’ திரைப்படத்தைப் பி.எஸ். வீரப்பா வெளியிட்டார். ஆனால், இயக்குநர் எம்.ஏ. திருமுகம் தொடங்கி,  வசனம் எழுதிய ‘அய்யாப்பிள்ளை’ வரை, தேவர் பிலிம்ஸின் தொழில்நுட்பக் குழுவால்தான் படம் உருவாக்கப்பட்டது. இந்த வகையிலும் மகாதேவன் இனிமையான பாடல்களை குறைவில்லாமல் வழங்கினார்!

(தொடரும்)